John 12
ព្រះយេស៊ូទទួលប្រេងតាំងនៅបេថានី
1មុនបុណ្យរំលងប្រាំមួយថ្ងៃព្រះយេស៊ូបានយាងមកក្រុងបេថានីជាកន្លែងដែលឡាសារនៅគាត់ជាអ្នកដែលព្រះយេស៊ូបានប្រោសឲ្យរស់ពីស្លាប់។ 2នៅទីនោះគេរៀបចំអាហារពេលល្ងាចសម្រាប់ព្រះអង្គហើយនាងម៉ាថាកំពុងបម្រើភ្ងៀវរីឯឡាសារវិញគាត់ក៏ជាម្នាក់នៅក្នុងចំណោមពួកអ្នកដែលអង្គុយរួមតុអាហារជាមួយព្រះអង្គដែរ។ 3នៅពេលនោះនាងម៉ារាយកប្រេងក្រអូបទេពិ្វរូសុទ្ធដ៏មានតម្លៃចំណុះប្រហែលកន្លះលីត្រមកចាក់លាបបាទារបស់ព្រះយេស៊ូរួចជូតបាទារបស់ព្រះអង្គដោយសក់របស់នាងក្លិនប្រេងក្រអូបនោះបានសាយភាយពេញក្នុងផ្ទះ 4ប៉ុន្ដែមានសិស្សម្នាក់របស់ព្រះអង្គឈ្មោះយូដាសអ៊ីស្ការីយ៉ុតជាអ្នកបម្រុងក្បត់ព្រះអង្គបាននិយាយថា៖ 5«តើហេតុអ្វីមិនលក់ប្រេងក្រអូបនេះឲ្យបានបីរយឌេណារីហើយចែកទានអ្នកក្រទៅ?» 6គាត់និយាយដូច្នេះមិនមែនដោយព្រោះគាត់យកចិត្ដទុកដាក់ចំពោះអ្នកក្រទេគឺគាត់ជាចោរជាអ្នកកាន់ថង់ប្រាក់ហើយបានកេងយករបស់ដែលដាក់នៅក្នុងនោះ។ 7ប៉ុន្ដែព្រះយេស៊ូមានបន្ទូលថា៖ «ទុកឲ្យនាងធ្វើចុះ! ដ្បិតនាងទុកប្រេងក្រអូបនេះសម្រាប់ថ្ងៃបញ្ចុះសពរបស់ខ្ញុំ។ 8អ្នករាល់គ្នាមានអ្នកក្រនៅជាមួយអ្នករាល់គ្នាជានិច្ចប៉ុន្តែខ្ញុំមិននៅជាមួយអ្នករាល់គ្នាជានិច្ចទេ»។ 9មានពួកជនជាតិយូដាច្រើនកុះករបានដឹងថាព្រះអង្គគង់នៅទីនោះដូច្នេះពួកគេនាំគ្នាមកប៉ុន្តែមិនមែនដោយព្រោះព្រះយេស៊ូប៉ុណ្ណោះទេគឺពួកគេចង់ឃើញឡាសារដែលព្រះអង្គបានប្រោសឲ្យរស់ពីស្លាប់ឡើងវិញនោះដែរ។ 10ពួកសម្ដចសង្ឃក៏ពិគ្រោះគ្នាដើម្បីសម្លាប់ឡាសារដែរ 11ហើយដោយសារតែគាត់ជនជាតិយូដាជាច្រើនដកខ្លួនចេញពីពួកគេទៅជឿលើព្រះយេស៊ូវិញ។ព្រះយេស៊ូយាងចូលក្រុងយេរូសាឡិម
12នៅថ្ងៃបន្ទាប់កាលបណ្ដាជនច្រើនកុះករដែលមកចូលរួមពិធីបុណ្យបានឮថាព្រះយេស៊ូកំពុងយាងមកក្រុងយេរូសាឡិម 13នោះពួកគេក៏យកធាងចាកចេញទៅទទួលព្រះអង្គទាំងស្រែកថា៖ «ហូសាណាសូមថ្វាយព្រះពរដល់ព្រះអង្គដែលយាងមកក្នុងព្រះនាមព្រះអម្ចាស់ជាស្ដេចរបស់ជនជាតិអ៊ីស្រាអែល!» 14កាលព្រះយេស៊ូរកបានកូនលាមួយក្បាលនោះព្រះអង្គក៏គង់លើខ្នងវាស្របតាមសេចក្ដីដែលបានចែងទុកមកថា 15កុំខ្លាចអីកូនស្រីក្រុងស៊ីយ៉ូនអើយ! មើល៍ស្ដេចរបស់អ្នកយាងមកហើយព្រះអង្គគង់លើខ្នងកូនលា។ 16មុនដំបូងពួកសិស្សរបស់ព្រះអង្គមិនយល់សេចក្ដីទាំងនេះទេប៉ុន្តែកាលព្រះយេស៊ូបានតម្កើងឡើងនោះទើបពួកគេនឹកឃើញថាសេចក្ដីទាំងនេះបានចែងទុកអំពីព្រះអង្គហើយពួកគេក៏បានធ្វើកិច្ចការទាំងនោះសម្រាប់ព្រះអង្គដែរ។ 17រីឯបណ្ដាជនដែលនៅជាមួយព្រះអង្គពួកគេបានធ្វើបន្ទាល់អំពីការដែលព្រះអង្គបានហៅឡាសារឲ្យចេញពីផ្នូរនិងបានប្រោសគាត់ឲ្យរស់ពីស្លាប់ឡើងវិញ 18ដូច្នេះហើយបានជាមានបណ្ដាជនទៅទទួលព្រះអង្គព្រោះពួកគេឮថាព្រះអង្គបានធ្វើទីសំគាល់អស្ចារ្យនោះ។ 19ពេលនោះពួកអ្នកខាងគណៈផារិស៊ីនិយាយគ្នាថា៖ «ឃើញទេយើងមិនឈ្នះទេមើល៍មនុស្សទៅតាមអ្នកនោះអស់ហើយ!»។ព្រះយេស៊ូប្រាប់អំពីការសោយទិវង្គតរបស់ព្រះអង្គ
20ក្នុងចំណោមពួកអ្នកដែលឡើងទៅថ្វាយបង្គំនៅក្នុងពិធីបុណ្យនោះក៏មានជនជាតិក្រេកខ្លះដែរ 21អ្នកទាំងនោះបានចូលមកជិតលោកភីលីពជាអ្នកក្រុងបេតសែដាក្នុងស្រុកកាលីឡេហើយពួកគេសុំគាត់ថា៖ «លោក! យើងចង់ឃើញព្រះយេស៊ូ» 22ដូច្នេះលោកភីលីពបានទៅប្រាប់លោកអនទ្រេហើយលោកអនទ្រេនិងលោកភីលីពក៏ទៅទូលព្រះយេស៊ូ។ 23ព្រះយេស៊ូមានបន្ទូលឆ្លើយទៅពួកគាត់ថា៖ «ពេលដែលកូនមនុស្សត្រូវតម្កើងឡើងនោះបានមកដល់ហើយ 24ខ្ញុំប្រាប់អ្នករាល់គ្នាជាពិតប្រាកដថាគ្រាប់ស្រូវដែលធ្លាក់ចុះទៅដីបើមិនងាប់ទេគ្រាប់នោះនៅតែមួយដដែលប៉ុន្ដែបើងាប់វិញនោះទើបបង្កើតផលបានច្រើន 25អ្នកណាដែលស្រលាញ់ជីវិតខ្លួននោះនឹងបាត់ជីវិតទៅប៉ុន្តែអ្នកណាដែលស្អប់ជីវិតខ្លួននៅក្នុងលោកិយនេះអ្នកនោះនឹងរក្សាជីវិតបានរហូតអស់កល្បជានិច្ច 26បើអ្នកណាបម្រើខ្ញុំចូរឲ្យអ្នកនោះមកតាមខ្ញុំចុះខ្ញុំនៅទីណាអ្នកបម្រើរបស់ខ្ញុំក៏នៅទីនោះដែរហើយបើអ្នកណាបម្រើខ្ញុំនោះព្រះវរបិតានឹងលើកមុខអ្នកនោះឡើង។ 27ឥឡូវនេះខ្ញុំមានចិត្ដជ្រួលច្របល់ណាស់តើត្រូវឲ្យខ្ញុំនិយាយដូចម្ដេច? ឱព្រះវរបិតាអើយ! សូមសង្គ្រោះខ្ញុំពីពេលនេះផងប៉ុន្តែដោយព្រោះការនេះហើយបានជាខ្ញុំមកដល់ពេលកំណត់នេះ 28ឱព្រះវរបិតាអើយសូមតម្កើងព្រះនាមរបស់ព្រះអង្គ!»។ នោះស្រាប់តែមានសំឡេងមួយពីលើមេឃមកថា៖ «យើងបានតម្កើងឡើងហើយយើងនឹងតម្កើងឡើងទៀត»។ 29ពេលនោះបណ្ដាជនដែលឈរនៅទីនោះបានឮក៏និយាយថា៖ «មានផ្គរលាន់!» អ្នកខ្លះទៀតនិយាយថា៖ «មានទេវតានិយាយជាមួយគាត់» 30ប៉ុន្តែព្រះយេស៊ូមានបន្ទូលឆ្លើយថា៖ «សំឡេងនេះមកមិនមែនដោយព្រោះខ្ញុំទេគឺដោយព្រោះអ្នករាល់គ្នាវិញ 31ឥឡូវនេះជាពេលជំនុំជម្រះពិភពលោកនេះហើយត្រូវបណ្ដេញពួកអ្នកគ្រប់គ្រងពិភពលោកនេះចេញ 32រីឯខ្ញុំវិញបើខ្ញុំត្រូវបានលើកឡើងពីផែនដីនេះនោះខ្ញុំនឹងនាំមនុស្សទាំងអស់ឲ្យមកឯខ្ញុំ»។ 33ព្រះអង្គមានបន្ទូលដូច្នេះដើម្បីបង្ហាញថាការដែលព្រះអង្គសោយទិវង្គតជាការសោយទិវង្គតបែបណា។ 34បណ្ដាជនទូលឆ្លើយទៅព្រះអង្គថា៖ «យើងបានឮពីគម្ពីរវិន័យថាព្រះគ្រិស្ដត្រូវគង់នៅអស់កល្បជានិច្ចចុះហេតុដូចម្ដេចបានជាអ្នកនិយាយថាកូនមនុស្សត្រូវលើកឡើងដូច្នេះ? តើកូនមនុស្សនោះជានរណា?» 35ព្រះយេស៊ូមានបន្ទូលទៅពួកគេថា៖ «ពន្លឺនៅក្នុងចំណោមអ្នករាល់គ្នាតែមួយរយៈពេលខ្លីទេដូច្នេះចូរដើរនៅពេលដែលអ្នករាល់គ្នានៅមានពន្លឺចុះដើម្បីកុំឲ្យសេចក្ដីងងឹតតាមអ្នករាល់គ្នាទាន់ឯអ្នកដែលដើរក្នុងសេចក្ដីងងឹតគេមិនដឹងថាខ្លួងឯងកំពុងទៅណាទេ។ 36ចូរជឿលើពន្លឺចុះទាន់អ្នករាល់គ្នានៅមានពន្លឺដើម្បីឲ្យអ្នករាល់គ្នាត្រលប់ជាកូននៃពន្លឺ»។ កាលព្រះយេស៊ូមានបន្ទូលអំពីសេចក្ដីទាំងនេះហើយព្រះអង្គក៏យាងចេញទៅហើយលាក់ខ្លួនពីពួកគេ។លោកអេសាយថ្លែងទុកអំពីភាពគ្មានជំនឿ
37ទោះបីព្រះយេស៊ូបានធ្វើទីសំគាល់អស្ចារ្យជាច្រើននៅចំពោះមុខពួកគេយ៉ាងណាក៏ដោយក៏ពួកគេនៅតែមិនជឿលើព្រះអង្គដែរ 38ដូច្នេះក៏សម្រេចតាមពាក្យរបស់លោកអេសាយជាអ្នកនាំព្រះបន្ទូលដែលបានថ្លែងទុកមកថាព្រះអម្ចាស់អើយ! តើអ្នកណាជឿលើសេចក្ដីដែលយើងបានប្រាប់? តើព្រះហស្តរបស់ព្រះអម្ចាស់បើកសំដែងឲ្យអ្នកណាឃើញវិញ? 39ដូច្នេះហើយពួកគេមិនអាចជឿបានឡើយព្រោះលោកអេសាយបានថ្លែងទុកទៀតថា 40ព្រះអង្គបានធ្វើឲ្យភ្នែករបស់ពួកគេខ្វាក់ហើយឲ្យចិត្តរបស់ពួកគេរឹងដើម្បីកុំឲ្យពួកគេមើលឃើញដោយភ្នែកហើយយល់នៅក្នុងចិត្ដរួចប្រែចិត្តនោះយើងនឹងប្រោសពួកគេឲ្យជា។ 41លោកអេសាយនិយាយអំពីសេចក្ដីទាំងនេះព្រោះគាត់បានឃើញសិរីរុងរឿងរបស់ព្រះអង្គហើយគាត់ក៏ថ្លែងទុកអំពីព្រះអង្គ។ 42ទោះជាយ៉ាងណាក្ដីក៏មានច្រើននាក់ក្នុងចំណោមពួកមេដឹកនាំជឿលើព្រះអង្គដែរប៉ុន្តែដោយសារតែពួកអ្នកខាងគណៈផារិស៊ីពួកគេមិនប្រកាសជំនឿរបស់ខ្លួនទេក្រែងលោត្រូវបណ្ដេញចេញពីសាលាប្រជុំ 43ព្រោះពួកគេចូលចិត្តការសរសើររបស់មនុស្សជាងការសរសើររបស់ព្រះជាម្ចាស់។សេចក្ដីសង្ខេបអំពីបេសសកម្មរបស់ព្រះយេស៊ូ
44ព្រះយេស៊ូបន្លឺសំឡេងឡើងថា៖ «អ្នកណាដែលជឿលើខ្ញុំអ្នកនោះមិនមែនជឿលើខ្ញុំទេគឺជឿលើព្រះមួយអង្គដែលបានចាត់ខ្ញុំឲ្យមក 45ហើយអ្នកណាដែលឃើញខ្ញុំអ្នកនោះក៏ឃើញព្រះមួយអង្គដែលបានចាត់ខ្ញុំឲ្យមកដែរ 46ខ្ញុំជាពន្លឺមួយដែលមកក្នុងពិភពលោកនេះដើម្បីឲ្យអស់អ្នកដែលជឿលើខ្ញុំមិននៅក្នុងសេចក្ដីងងឹតទៀតឡើយ 47បើអ្នកណាឮពាក្យរបស់ខ្ញុំប៉ុន្តែមិនធ្វើតាមនោះខ្ញុំក៏មិនដាក់ទោសគេដែរដ្បិតខ្ញុំមិនមែនមកដាក់ទោសមនុស្សលោកឡើយគឺមកសង្គ្រោះមនុស្សលោកវិញ 48អ្នកណាដែលបដិសេធខ្ញុំហើយមិនទទួលពាក្យរបស់ខ្ញុំអ្នកនោះមានចៅក្រមដាក់ទោសគេហើយគឺជាពាក្យដែលខ្ញុំបាននិយាយនោះឯងដែលនឹងដាក់ទោសគេនៅថ្ងៃចុងក្រោយ 49ព្រោះខ្ញុំមិនបាននិយាយដោយខ្លួនខ្ញុំទេផ្ទុយទៅវិញព្រះវរបិតាដែលបានចាត់ខ្ញុំឲ្យមកបានបង្គាប់ខ្ញុំអំពីអ្វីដែលខ្ញុំត្រូវនិយាយនិងអ្វីដែលខ្ញុំត្រូវប្រាប់ 50ហើយខ្ញុំដឹងថាសេចក្ដីបង្គាប់របស់ព្រះអង្គជាជីវិតអស់កល្បជានិច្ចដូច្នេះអ្វីដែលខ្ញុំប្រាប់គឺខ្ញុំប្រាប់តាមតែព្រះវរបិតាបានប្រាប់ខ្ញុំប៉ុណ្ណោះ»។
Copyright information for
KhmKCB